ತುಳುವೆರೆ ಪೊಂಜೊವು ಬೊಕ್ಕ ದೈವಾರಾಧನೆ

ದೇವಕ್ಷೇತ್ರೊಲೆಡ್ ಕಾಶಿಡ್ಡದ್ ಮಿತ್ತ ಪುಣ್ಯ ಕ್ಷೇತ್ರ ಇಜ್ಜಿ. ಅವುಲು ಪೊಂಜೊವು ಅಂಜೊವು ಇಂದ್ ತೂವಂದೆ, ಲಿಂಗ ಮುಟ್ಟುದು ಪೂಜೆ ಮಲ್ಪೊಲಿ. ನಮ್ಮೂರುಡು ಬೂತಶಕ್ತಿಲೆನ್ ಇಸರದೇವೆರೆ ಗಣೊಕುಲು ಇಂದ್ ಪನ್ಪೆರ್. ಬೂತೊಲು ಇಸರದೇವೆರೆ ಗಣೊಕುಲು ಪನ್ಪಿನೆಕ್ಕ್ ಆಧಾರ ಇಜ್ಜಿ. ಅವು ಬೇತೆ ಬುಡ್ಕ. ಸದ್ಯೊಗು ಇಸರದೇವೆರೆ ಗಣೊಕುಲು ಇಂದ್ ಎನ್ನಗ. ಇಸರ ದೇವೆರೆಗ್ ಪೊಂಜೊವು ಕಾಶಿಡೇ ಪೂಜೆ ಮಲ್ಪೊಲಿಡ, ಆಯನ ಗಣೊಕುಲೆಗ್À  ಪೊಂಜೋವು ದೇ ಬೊಡ್ಚಿ ಪನ್ಲೆಗೆ. ನಮ್ಮ ಈ ಭಾರತ ಪುಣ್ಯ ಭೂಮಿಡ್ 12 ಜ್ಯೋತಿರ್ಲಿಂಗ ಕ್ಷೇತ್ರ ಉಂಡು. ಅಯಿಟ್ 6 ಜ್ಯೊರ್ತಿಲಿಂಗ ಕ್ಷೇತ್ರೊಗು ಪೋತೆ. ಒರ್ಮೆಲಾ ಪೊಂಜೋವೆನ್ ಗುಂಡದ ಉಲಯಿ ಪೊಗ್ಗರೆ ಬುಡ್ಪೆರ್.
50/60 ವರ್ಷ ದುಂಬು ಎನ್ನ ಮಲ್ಲ ಅಪ್ಯೆ ಪಂತಿನೆನ್ ನಿಕುಲುಲಾ ಒಂತೆ ಕೇನ್ಲೆ:
 “ತೂಲ ಮಗಾ ಈ ಅಂಜೊವೊಲು ಉಲ್ಲೆರತ್ತಾ, ಗುರ್ಕಾರೆ ಆಯಿನಕುಲು ಅಕುಲು ಮಲ್ತಿನ ನಡಪುಂಡು. ಯಾನ್ ಎಲ್ಲಿ ಉಪ್ಪುನಗ ಗುಲ್ಗಗ್ ಅಗೆಲ್ ಮಲ್ಪುನಡೆ ಎಂಕುಲು ಪೊಣ್ಣು ಜೋಕುಲು ಪೋವೊಂದು ಇತ್ತ. ಅವೆನ್ ಉಂತಾಯಿನಿ ಈ ಅಂಜೋವಲ್ಲು. ಗುಲ್ಗೆ ಬತ್ತ್ ಪೊಂಜೋವು ಬೊಕ್ಕ ಪೊಣ್ಣು ಜೋಕುಲು ಎನ್ನ ಅಗೆಲ್ ಉನರೆ ಬಲ್ಲಿ ಪಂತೆನಾ? ಇತ್ತೆ ಪೊಣ್ಣು ಜೋಕುಲೆನ್ ಪೋರೆ ಬಲ್ಲಿ ಪನ್ಪೆರ್” ಈ ಪಾತೆರ ಎಂಕ್ ಮಾತ್ರ್ ಪೋತುಜಿ.
ಆತನಟ್ಟ ಯಾನ್ ಬೂತದ ಕಯಿತಲ್ ಪೊಂಜೊವು ಪೋರೆ ಬಲ್ಲಿ ಪಂತಿನೆನ್ ಗಟ್ಟಿ ನಂಬುದಿತ್ತೆ. ಎಂಕಲೆ ಗುಲ್ಗನ ಅಲ್ಪ, ಅಡ್ಪಿ ಕೋರಿಗ್ ರುಚಿ ಎಚ್ಚ ಪಂಡ್‍ದ್  ಆನ್ ಜೋಕುಲು ಎಂಕಲ್ಡ್ ಪಂಡ್‍ದ್ ಬಾಯಿಡ್ ನೀರ್ ಜಪುಡಾವೊಂದು ಇತ್ತೆರ್. ಅಪಗ ಪೊಣ್ಣು ಜೋಕುಲೆಗ್ ಬೆಸರ್ ಆವೊಂದು ಇತ್ತ್‍ಂಡ್. ಪೊಂಜೋಕುಲು ಗುಲ್ಗನಡೆ ಪೋಂಡ ದಾನಿ ಆಪುಂಡು ಅವು ಎಂಕಲೆನ್ ದೈವ ಅತ್ತ? ಇಂಚ ಮಾತ ಎಂಕುಲು ಪ್ರಶ್ನೆ ಪಾಡಿಯರೆ ಎನ್ನ ಮಲ್ಲ ಅಪ್ಯೆ ತೋಜಾದಿನ ಸುಡರ್ ಕಾರಣ.
ಇತ್ತೆ ಊರುಡು ಜನಮಾನಿ ದಾಂತೆ ಉಪ್ಪುನಗ ಗುಲ್ಗನಡೆಗ್ ಪೊಂಜೋವೆನ್ ಬಲೆ ಬಲೆ ಪಂದ್ ಲೆಪ್ಪುವೆರ್.
ಎನ್ನ ಮಲ್ಲ ಅಪ್ಯೆ ಪಂಡಿನ ಸತ್ಯ. ಬೂತೊಲು ಗುರ್ಕಾರೆ ಪಂಡಿಲೆಕ್ಕ ಕೇನುವ.
‘ಮಾಯೆ ಪಿರ ಮದಿಪು ದುಂಬು’ ಪನ್ಪಿ ಪಾತೆರದ ಅರ್ಥಲಾ ಅವ್ವೆ. ಪತ್ತೆರೆ ಮದಿಪುಗು ಒಲಿದ್ ತರೆ ತಗ್ಗಾವು ಬೂತ ಅತ್ತೆ.
ಬೂತೊಲೆನ್ ಮುಟ್ಟ ಪೊಂಜೋವು ಪೋಪಿನ ಕಟ್ಟಲೆಲಾ ತುಲುನಾಡ್ದ್ ಒರ್ಮೆಲಾ ಒಂಜೇ ಲೆಕ್ಕ ಇಜ್ಜಿ. ಒಂಜಿ ಊರ್ದ ಕಟ್ಟ್ ಕಟ್ಟಲೆ ಬೇತೆ ಊರುಡು ಉಪ್ಪುಂಡು ಇಂದ್ ಪನರೆ ಆಪುಜಿ. ತುಲು ದೇಸ ತುಂಡು ರಾಜೆರ್ ಅಲೊಂದಿತ್ತ್‍ನವು. ಒಂಜಿ ಊರುದ ರಾಜೆ ಮಲ್ತಿನ ಕಟ್ಟ್ ಕಟ್ಟಲೆ ಆ ಊರುಗು ಮಾತ್ರ. ಅಯನ್ ಬರಿತ ಊರುಗುಲಾ ಆ ಕಟ್ಟ್ ಕಟ್ಟಲೆ ನಡಪುಜಿ. ದೈವದ ಕೆಲಸೊಡುಲಾ ಆ ತುಂಡು ರಾಜೆಲಾ ಆಯನ ದೇಸದ ಅಜಲ್‍ದ ಗುರ್ಕಾರ್ಲುಲಾ ಸೇರ್ದ್ ನಿರ್ಣಯ ಮಲ್ತಿನವು. ಆನಿದಾ ಕಾಲೊಡು ಅಜಲ್‍ದ ಇಂಚಿತ್ತಿ ಕೂಟೊನು “ಕೂಟದ ಕಲ” ಇಂದ್ ಲೆತೊಂದು ಇತ್ತೆರ್. ಕೂಟದ ಕಲೊಕು ಪೊಣ್ಣು ಪೊಂಜೊವು ಪೋರೆ ಇತ್ತ್‍ಜಿ. ತಪ್ಪು ಮಲ್ತಿ ಪೊಂಜೊವೆಲೆನ್ ಮಾತ್ರ ಕೂಟದ ಕಲತ ಪಂಚೆತಿಕೆದಕುಲು ಲೆತೊಂದು ಇತ್ತೆರ್.
ಯಾನ್ ನಾಲೂರುಗು ಸುತ್ತುದು ತೆರಿ ವಿಷಯೊಡು ಪುತ್ತೂರು, ಬಂಟ್ವಾಳ, ಸುಳ್ಯ, ಕಾಸರಗೋಡು –ಮುಲ್ಪದ ಕಡೆಟ್ ಪೊಣ್ಣು ಜೋಕುಲು ಬೂತದ ಕಯಿತಲ್ ಪರಕೆಪಾಡರೆ ಪೋರೆಲ ಇಜ್ಜಿ. ಪೊದ್ದೆ ಪರಕೆದ ಪ್ರಸಾದೊನು ಭೂತದ ಕೈಯಿಡ್ದ್ ಗೆತೊಂದು ಬುಡೆದಿಗ್ ಕಂತ್ ಕೊರ್ಪಿನಿ. ನಾಗ ಬನದ ಉಲಯಿ ಪೊಂಜೊವು ಪೊಗ್ಗರೆನೆ ಇಜ್ಜಿ. ಉಡುಪಿ, ಕುಡ್ಲದಂಚಿ ನಾಗಬನೊಕು ಪೊಂಜೋವೆ ಪೋದು ನಾಗಗ್ ತನು ಮಯಿಪಾವೆರ್. ಗಟ್ಟದ ಮಿತ್ತಡ್ ಬೆರನೆರ್ ಬರಿಯರೆ ಇಜ್ಜಿ. ಪೊಂಜೋವೆ ಪೋದು ಪುಂಚೊಗು ಪೇರ್ ಮೈತ್ ಪುಂಚ ತಂಪು ಮಲ್ತ್ ಬರ್ಪೆರ್.
 ನಮ್ಮ ಈ ತುಲು ನೆಲತ ದೈವೊಲೆನ ಚಾಕ್ರಿ ಪೊಂಜೊವು ಮಲ್ಪರೆ ಇಜ್ಜಿ. ಇಂಚ ದ್ಯಾಗ್? ಏರ್ಲಾ ಪಿಂಬರಾ?
ಯಾನ್ ಈ ವಿಷಯೊಡು ಬೂಕು ಬರೆರೆಗ್ ಪಿದ್‍ಡ್‍ನಗ ಕೆಲವು ಬೂತೊಲೆ ಕಯಿತಲ್ಡಲಾ ಪೋಪಿನ ಅಗ್ತತ್ಯ ಬೂರ್ದುಂಡು. ಈ ವಿಷಯ ಎನ್ನ ಗುತ್ತುದ ಗುರ್ಲಾರ್ಲೆಗ್ ಗೊತ್ತಿತ್ತ್‍ಂಡ್.

ಸಿಮಂತೂರು ಎಲತ್ತೂರುದ ರಡ್ಡ್ ಊರುದ ಊರ ದೈವ ಜಾರಂದಾಯಗ್ ಗಡಿತ ಗುರ್ಕಾರೆ ಎನ್ನ ಎಲತ್ತೂರು ಗುತ್ತುದ ಕುಟುಮದಾಯೆ ಆವೊಡು. ಜಾರಂದಾಯ ದೈವದ ಚಾವಡಿ ಮಜಲಗುತ್ತುಡು. ‘ತಲ’ ತಕ್ಕನ ಪಾದೆಡ್. 1999ಡು ಗಡಿ ಆನಗ ತೊಡರ ಬಲಿ ಕೊರಿನ ತಲೊಟು ಎನ್ನ ಇಲ್ಲದ ಎರಿಯಾಯಿನಾರ್ ಎನನ್ ಎದುರು ಬರಿಯರೆ ಲೆತ್ತೆರ್. ಯಾನ್ ಅಂಜೋವೆನ್ ಕೂಟೊಡು ನೂರೊಂದು ದುಂಬು ಪೋನಗ, “ ಇಂದ್ರಕ್ಕ ಈರ್ ಒಡೆಯೆ, ದುಂಬು ದುಂಬು ಬರ್ಪಿನಿ?” ಇಂದ್ ಎನ್ನಡ್ದ್ ಎಲ್ಯೆ ಪ್ರಾಯದ ಆನ್ ದೊಂಡೆ ಲಕ್ಕಾಯೆ. ಆಯನ ಪಂಡಿ ಬಾಯಿ ದೊಂಡೆಡಾವೊಡ್ಡ ದುಂಬು, ಮಾನೆಚ್ಚಿಡ್ ಬೈದಿ ಜಾರಂದಾಯೆ ದೈವ ಒರನೇ ಅರಬಾಯಿ ದೀದ್ ಆ ಆನನ ರಟ್ಟೆ ಪತ್ತ್‍ದ್ ಬೀಜಾದ್ ತನ್ನ ಪಿರ ನೂಕುನಗ ಸೇರ್ದಿ ಗ್ರಾಸ್ತೆರ್ ಮೈ ಕೊಕ್ಕೆಂರ್ಡ್.  “ಏರ್‍ಯಾ ಈ? ಎನ್ನ ಪೊನ್ನಸಂತಾನ ಎನ್ನ ಕಯಿತಲ್ ಬಪ್ರ್ಪಿನೆನ್ ತಡೆಪುನಾಯೆ?” ಇಂದ್ ದೊಂಡೆ ಬುಡ್ನಗ ಸೇರ್ದಿ ಮಂದೆ ಗಪ್‍ಚಿಪ್. ಮಾನೆಚ್ಚಿದ ದೈವ  “ಎನ್ನ ಪೊನ್ನ ಸಂತಾನೊಡು ಯೇರ್ ಮಾತಾ ಬಯಿದೆರ್ ಎನ್ನ ಬಲತ ಭಾಗೊಡು ಉಂತುಲೆ” ಪಂಡೆ. ಗಡಿ ಆಪಿ ಕಲೊಕು ಪೊಂಜೊವು ಪೋರೆ ಇಜ್ಜಿ ಪಂಡ್‍ದ್ ಯೇರ್‍ಲಾ ಬಯಿದ್‍ಜೆರ್. ಯನಡಪ್ಪ ಬಯಿದಿನ ಒಂಜಿ ಎಲ್ಯ ಪೊಣ್ಣಡಲಾ ಎನಡಲಾ ‘ಈ ನರಮಾನಿಗ್ ಗಡಿ ಮಲ್ಪರೆ ನಿಕಲೆ ಒಪ್ಪಿಗೆನಾ?’ ಈಂದ್ ಕೂಡಿ ಗ್ರಾಸ್ತೆರೆನ ನಡುಟು ದೈವ ಕೇನ್ನಗ ಎಂಕ್ ತೆರಿಂಡ್, ‘ಬೂತೊಲೆಗ್ ಪೊಣ್ಣ ಸಂತಾನ ಬೋಡು. ನಮ್ಮ ಆನುಲೆಗ್ ಪೊಣ್ಣುಲು ಒಯಿಕ್‍ಲಾ ದುಂಬು ಒತ್ತರೆ ಬಲ್ಲಿ ಇಂದ್.’
 ಕೋಲದ ಮುಗಿತಲೊಟು, ಕಂಬುಲದ ಮುಗಿತಲೊಟು, ಅತ್ತಾಂದೆ ಒವ್ವಾಂಡಲಾ ದೈವದ ಕೆಲಸದ ಮುಗಿತಲೊಡು, ಪಂಬದೆಚ್ಚಿ ಇಜ್ಜಿಡ ಮಾನೆಚ್ಚಿಡ್ ಬತ್ತಿ ದೈವ ಕುಟುಮದ ಪೊಂಜೊವು ಮಾತ್ರ ಪೇರ್ ಕೊರೊಡತ್ತೆ? ಅಪಗ ಬೂತೊಲೆ ಪೊಂಜೋವು ದೂರ ಅತ್ತ್. ನಮ್ಮ ಕೆಲವು ಗುರ್ಕಾರ್ಲೆಗ್ ಪೊಂಜೋವು ದೂರ ಉಂತೊಡು.
  2000 ವರ್ಷ ದುಂಬುದ ತಮಿಳ್ ಸಂಗ ಸಾಹಿತÀ್ಯದ ಕನ್ನಗಿನ ಕತೆಟ್ ಪೊಂಜೊವೆನ್ ಮೈಟ್ ದೈವ ದರ್ಶನ ಬಯಿದಿನ ಬರೆತೆರ್. “ವರಿಕೋಲ” (ಮರಿಕೋಲ?) ಬೂತಪಾತ್ರಿ ಪೊಂಜೋವು. (ಶಿಲಪ್ಪದಿಗಾರಂ.ಕನ್ನಡ ಕುಕ್ಕಿಲ ಕೃಷ್ಣ ಭಟ್. ಪು 4 ಕನ್ನಡ ವಿಶ್ವ ವಿದ್ಯಾಲಯ ಹಂಪಿ.2004)
ರೋಂ ದೇಸೊಡು 2300ವರ್ಸೊ ದುಂಬುದ  ಗ್ರೀಕ್ ನಾಟಕೊಡು ಪಣಂಬೂರುದ ದೇವಸ್ಥಾನೊಡು ಒಂಜಿ ಪೊಣ್ಣು ದೇವೆರೆಗ್ ‘ಪೂನೀರ್’ ದೀವೊಂದು ಇತ್ತೊಲು ಪನ್ಪುಂಡು. ಆಲ್ ಗ್ರೀಕ್‍ಗ್ ಅಲೆನ ಅಮ್ಮೆರೆನ್ ತೂವರೆ ಪೋತೊಲು ಪನ್ಪುಂಡು ನಾಟಕೊಡು
ಅಪಗ ಒಂಜಿ ಕಾಲೊಡು ದೈವ ದೇವೆರೆಗ್ ಪೊಂಜೊವು ಬೇಲೆ ಮಲ್ತ್‍ದೆರ್. ಇತ್ತೆ ಪೊಣ್ಣು ಬೂತೊಲೆಗ್ ಆನ್‍ಲ್ ಕಟ್ಟೊಡು. ಮಾತ್ರ ಅತ್ತ್ ಪೊಣ್ಣುಲು ಮುಟ್ಟ ಪೋರೆಲಾ ಇಜ್ಜಿ.

ಇತ್ತೆ ಪೊಂಜೊವೆನ್ ಪೋಡ್ಪಾದೀತೆರ್. ಅಂಜೊವೆಗ್ ಬೂತದ ಪೋಡಿಗೆ ಇಜ್ಜಿ. ಪೋಡಿಗೆ ಇತ್ತ್‍ಂಡ ಮದುಪನರೆ ಕುಟುಮೊದ ಪಿದಯಿದಕಲೆನ್ ಲೆಪ್ಪುವೆರಾ? ದೈವದ ಕುಟುಮದಾಯೆ ಕೈಟ್ ಗುಡ್ಡೆದ ಪೂ ಪತ್‍ದ್(ಕೇಪು¯) ಅಕಲೆ ದೈವೊನು ನೆನೆತ್‍ದ್ “ಸ್ವಾಮೀ…..” ಪಂಡೆಡ್ ದೈವ್ ಮಾನೆಚ್ಚಿಡಾ, ಪಂಬದೆಚ್ಚಿಡಾ ಬರೊಡು ಪನ್ಪೆರ್ ಹಿರಿಯೆರ್. ಮೂಜಿನಾಯೆ ಮಧು ಪಂಡೆಡಾ ಕಟ್ಟ್ ಕಟ್ಲೆ ಪ್ರಕಾರ ದೈವ ಮಾನೆಚ್ಚಿಡಾಡ್ ಪಂಬದೆಚ್ಚಿಡಾಡ್ ಬರಿಯರೆ ಬಲ್ಲಿ. ಕುಟುಮದಾ ಎಲ್ಯ ಆನ್ ಆಂಡಲಾ ನಡಪುಂಡು. ಆಯೆ ಕೇಪುಲ ಪೂ ಪತ್ತ್‍ದ್ ಕೈ ಮುಗಿದ್ ಉಂತಿಯೆಡ ಮಾಯದ ದೈವ ಜೋಗೊಡು ಬತ್ತ್‍ಜಿಡ ದೈವ ಕಟ್ಟ್‍ದಿನಾಯಗ್ ಮನದಾನಿದ ನೆಸರ್ ತೂವರೆ ಇತ್ತ್‍ಜಿಗೆ.
ಇತ್ತೆ ಬೂತೊಲೆಗ್ ಯೇರೇರ್ ಬತ್ತ್ ಮಧು ಪನ್ಪೆರ್. ಮಧು ಪನ್ಪಿನ ಸಂಪಾದನೆದ ತಾದಿ ಆತ್‍ಂಡ್. ಮನಸ್‍ದ್ ಭಕ್ತಿ ಪಿರ ಉಂತುಂಡು. ಪಣವುದ ಶಕ್ತಿ ದುಂಬು ಬತ್ತ್‍ಂಡ್. ನೆಕ್ಕ್ ಕಾರಣ ಆಯಾ ಇಲ್ಲದ ಗುರ್ಕಾರೆನೆ. ‘ಅನಾದಿ ಕಾಲೊಡ್ದ್ ಬಯಿದಿ ಕಟ್ಟ್ ಸಾರ ಕಾಲ ಮುಟ್ಟ ಕೋಡಿ ಎತ್ತಾವೆ ಪಂತಿ ಬೂತ’ ಗುರ್ಕಾರ್ಲೆನ ಎದುರು ತರೆ ತಗ್ಗಾದ್ ಉಂತುಂದುಂಡು. ‘ರಾವು ಪಕ್ಕಿಗ್ ಪರಪು ಪಿಜ್‍ನ್‍ಗ್ ಆಧಾರ ಉಂತುವೆ’ ಪಂತಿ ಭೂತ ಪೊಣ್ಣುಲೆಗೇ ಆದಾರ ಉಂತೊಂದು ಇಜ್ಜಿ.
 ಎನ್ನ ಮಲ್ಲ ಅಪ್ಯೆ ಪಂತಿ ಪಾತೆರ ಅಪಗ ಎಂಕ್ ನೆನಪಾವೊಂದು ಇತ್ತ್‍ಂಡ್. “ಬೂತೊಲು ಗುರ್ಕಾರೆ ಪಂಡಿಲೆಕ್ಕ ಕೇನುವಾ, ಎಡ್ಡೆ ಮಲ್ಪುನಾ ಬೊಕ್ಕ ಪಡ್ಕೆ ಮಲ್ಪುನಾ ಗುರ್ಕಾರನ ಕೈಟ್ ಉಪ್ಪುನು” ಇಂದ್.
ನಿಕಲೆ ನಿಕಲೆ ಇಲ್ಲಡೇ ತೂಲೆ. ನಿಕುಲು ಎಲ್ಲಿ ಪೋದು ಮಲ್ಲೆ ಆನಗ ಬೂತದ ಇಲ್ಲಲೆಡ್ ಯೇತ ಮಾತ ಬದಲಾವಣೆ ಆಂಡ್ ಪಂಡ್‍ದ್. ಇತ್ತೆ ಬೂತೊಲು ತಮಾಸೆದ ವಸ್ತು ಆತ.
ಸುಮಾರ್ 50 ವರ್ಸೊಡ್ದು ದುಂಬು ತುಲುವ ಪೊಂಜೊವು ಅಂಜೋವೆಲಕ್ಕನೇ ಗುರ್ಕಾರ್ಮೆ ಮಲ್ತೊಂದು ಇತ್ತೆರ್. ಕೆಲವು ಗುತ್ತು ಬೂಡುಲೆ ಬಾರಗೆರ್ (ಜೈನೆರ್ ಬೊಕ್ಕ ಒಕ್ಕೆಲಕುಲು) ಗುರ್ಕಾರ್ಮೆ ಮಲ್ದೆರ್. ಒಂಜಿ ಗುತ್ತದ ಪೊಂಜೊವು ಅರೆನ ಗುರ್ಕಾಮೆದ ದೇವಸ್ಥಾನೊಡು ತಾನ್ ಪೋಡ್ಡ ದುಂಬು ಕೊಡಿ ಏರಾಯೆರ್ ಪಂಡ್‍ದ್ ಏರಿ ಕೊಡಿ ಜಪುಡಾದೆರ್‍ಗೆ.
ಅವು ದೇಗ್ ನಮ್ಮ ತುಳುದೇಸೊನು ಸುಮಾರ್ 750 ವರ್ಸೊ ದುಂಬು ಆಲ್ದಿನಾಲ್ ಆಳುಪ ವಂಶದ ‘ಬಲ್ಲಮಹಾದೇವಿ’ ಆಳುಪ ರಾಣಿ. ಆಲ್ ಅರಮನೆ ಚಾವಡಿಡ್ ರಾಣಿ ಆದ್ ಒಡ್ಡೋಲಗ ಕೊರ್ನಗ ಹೆಗ್ಗಡೇರ್ ಸೆನಾಧಿಕಾರಿಲು ಮಾತ ಸಭೆಟ್ ಕುಲ್ಲುದು ಇತ್ತೆರ್. ಆಲ್ ಕಂಬುಲಲಾ ಮಲ್ಪಾದೊಲ್. ಅಲೆಡ್ದ್ ಬೊಕ್ಕಲಾ ಕೆಲವು ರಾಣಿಲು ಈ ದೇಶೊನು ಆಲ್ದೆರ್.
ಆಂಡ ಇತ್ತೆದ ಕತೆನೇ ಬೇತೆ. ರಡ್ಡ್ ವರ್ಸೊಡ್ದು ದುಂಬು ಒಂಜಿ ಗುತ್ತುದ ಇಲ್ಲದ ಎದುರು ನೇಮ ಮುಗ್ಗಿಯರೆ ಆನಗ ಪಂಬದೆಚ್ಚಿಡ್ ಬೂತ ಪೇರ್ ಪರಿಯರೆ ಪೊಂಜೊವೆ ಕೈತಲ್ ಬತ್ತ್‍ಂಡ್. ಅಪಗ ಗಡಿ ಪತ್ತಿ ಗುರ್ಕಾರೆ ಪಂಡೆರ್ “ನಿನ್ನ ಚಾವಡಿದ ಎದುರು ಉಂತುದು ಪೊಂಜೊವು ಮುರಿಯ ದೀವರೆ ಬಲ್ಲಿ ಇಂದ್ ಒಂತೆ ಪೊಂಜೋವೆಗ್ ಪನೊಡು” ಇಂದ್.
ಅಪಗ ಪಂಬದೆಚ್ಚಿಡ್ “ಅಂದ್ ಮೂಲು ಪೆರಡೆ ಕಿಲೆಪುವಾ” ಇಂದ್ ಪಂಡ್ ದೈವ. ಉಂದು ದೈವ ಪನ್ನಿಯಾ ಪಂಬದೆ ಪನ್ನಿಯಾ ಪನ್ಪಿನಾವು ಎಂಕ್ ಅಗತ್ಯ ಇಜ್ಜಿ. ದೈವ ಮಾನೆಚ್ಚಿ ಉಂತಿ ಬೊಕ್ಕ ಪಂಬದೆ ಪನ್ನಿ ಇಂದ್ ನಮ ಪನರೆ ಬಲ್ಲಿ. “ಎನ್ನ ಪೊನ್ನ ಸಂತಾನ ಇಂದ್” ಬೊಕ್ಕಲ ಬೊಕ್ಕಲ ಪನ್ಪಿ ದೈವ ಪೆರಡೆ ಕಿಲಪರೆ ಬಲ್ಲಿ ಇಂದ್ ಎಂಚ ಪನ್ಪಿನಿ?” ಉಲಾಲ್ದಿ, ದುರ್ಗೆ, ಚಾಮುಂಡಿನಕುಲು ಕಿಲೆದ್‍ಜೆರಾ…? ಅಕುಲು ಪೆರಡೆಲು ಅತ್ತ್. ಅಕುಲು ಕಿಲೆತ್‍ದ್ ದೇವತೆನಕಲೆನ್ ರಕ್ಷಣೆ ಮಲ್ದ್‍ಜೆರಾ? ಅಪಗ ಪೆರಡ ಕಿಲೆದ್‍ಜಿಡ ದಾತ್ ಆತು ಪನ್ಲೆ?

ಬೂತೊಲೆನ ಕಯಿತಲ್ ಪೊಂಜೋವೆನ್ ಪೋರೆ ಬಲ್ಲಿ ಪನ್ಪಿನ ರಿವಾಜ್ ಬರಿಯರೆ ಕಾರಣ ಇತ್ತ್‍ಂಡ್. ನಮ್ಮ ಪಾಡ್ದನೊಡು ಬೂತೊಲು ಪಂಡ ಮನುಷ್ಯನ್ ಪಜ್ಜಿ ತಿನ್ಪಿಲೆಕ್ಕ ಕಥೆ ಕಟ್‍ದ್‍ಂಡ್. ಬೆರ್ಮೆರೆ ಕಾಡ್‍ಡ್ ಬಂಜಿನ ಪೊಂಜೋವೆನ ಬಂಜಿ ಜಾರು, ತನೆತ ಪೆತ್ತ ಕಂಜಿಪಾಡು…ಇಂಚಿತ್ತಿ ಕಥೆ ಉಂಡು. ಚಾಮುಂಡಿ ಕಥೆಟ್‍ಲಾ ಆಲ್ ರಕ್ತ ಬೀಜಾಸುರೆನ್ ಪಜ್ಜಿ ತಿಂತಿನಾಲ್. ಅಕಲೆ ಒಂಜಿ ಪನಿ ನೆತ್ತರೆ ಭೂಮಿಗ್ ಬೂರುಂಡ ಸಾರ ಗಟ್ಲೆ ರಕ್ತಬೀಜಾಸುರೆರ್ ಪುಟ್ಟುವೆರ್ ಪಂಡ್‍ದ್ ದುರ್ಗೆ ತನ್ನ ಶಕ್ತಿ ಆಯಿಂಚಿ ಚಾಮುಂಡಿಗ್ ಪಂಡೊಲು. ದುರ್ಗೆ ಕಟ್ತೊಂದು ಪೋನಗ ಒಂಜಿ ಬೊಟ್ಟು ನೆತ್ತರ್‍ಲಾ ನೆಲಕ್ ಬೂರಂದಿ ಲೆಕ್ಕ ನಕ್ಕ್‍ದ್ ದೆತ್ತಿನಾಳ್ ಚಾಮುಂಡಿ
ಉಪ ಸಂಹಾರ
ಪರಪು ನೀರ್ ಲೆಕ್ಕ ಪರಪುನವು ಪರಪೋಕುದ ಲಕ್ಷಣ. ಪರನೀರ್ ದುಂಬು ಪರಪುನಗ ಪೊಸನೀರ್ ಸೇರ್ದ್ ಪರಪುಂಡು. ಈ ಪರಪುಡು ಪೊಂಜೊವೆಲ್ ಪರಪುಗು ಪೊಸನೀರ್ ದೇಗ್ ಸೇರುಜಿ ಪನ್ಪಿನವು ಚೋದ್ಯದ ವಿಷಯ. ನೆಟ್ಟ್ ಇಂಚಪ್ಪ ನಮ್ಮ ಒರಿ ರಾಜಕಾರಿಣಿ ಬದಲಾವಣೆ ಕನರೆ ಪ್ರಯತ್ನ ಪಲೊಂದು ಉಲ್ಲೆರ್.
ಮಹಾರಾಷ್ಟ್ರದ ಸನಿ ಸಿಂಗಾಪುರುಡು ಇತೋರ್ತು ಪೊಂಜೋವು ಮುಟ್ಟ ಪೋರೆ ಇತ್ತ್‍ಜಿ. ಇತ್ತೆ ಅಲ್ತ್ ಎಂಡೋ ಮೇಂಟ್‍ಡ್ ಗುರ್ಕಾರ್ದಿ ಪೊಂಜೋವು ಆಯೆರ್.
ನಮ್ಮ ಊರುಡು ವಾ ದೈವಸ್ಥಾನೊಡು ಆಡ್ ದೇವಸ್ಥಾನೊಡು ಆಡ್ ಪೊಂಜೋವು ಎಂಡೋ ಮೆಂಟ್‍ದ್ ಗುರ್ಕಾರ್ದಿ ಆತೆರ?
ನಮ್ಮೂರುಡು ದೇಗ್ ಇತ್ತೆಲಾ ದೈವ ದೇವೆರೆಗ್ ಪೊಂಜೋವು ದೂರ?